مرکزی جلوس محمدی گاگریا وعلاقۂ گپن سے سہلاؤ شریف تک شان و شوکت سے نکلا
سہلاؤشریف میں عظیم الشان سالانہ جلسۂ عید میلادالنبیﷺ سے علماء کا خطاب
باڑمیر/راجستھان(پریس ریلیز)
سالہائے گذشتہ کی طرح امسال بھی حضور نبی رحمت ﷺ کی یوم ولادت باسعادت بہت ہی دھوم دھام،شان وشوکت اور عقیدت واحترام کےساتھ منایاگیا،یوں تو ماہ ربیع النورشریف کا چاند نظر آتے ہی عاشقان رسول ﷺ اپنے دوکان مکان گلی اور چوراہوں بالخصوص مساجد ومدارس اور درگاہوں کو رنگ برنگے جھنڈوں برقی قمقموں ،روشنیوں اور جھرمٹوں سے سجاکر پرکشش بنادیتے ہیں مگر ربیع النور کی باریویں شب وروز کے مناظر تو کچھ اور ہی دیدہ زیب ودل آویز مناظر پیش کرتے ہیں بارہویں شب میں عموما مسلم آبادیوں میں جلسۂ عید میلادالنبی ﷺ کا شایان شان طریقے پرانعقاد کیا جاتا ہے جب کہ بارہ ربیع النور شریف کو جلوس عید میلاد النبی ﷺ نکالنے کا باقاعدہ انتظام وانصرام ہوتا ہے،جلسۂ عید میلادالنبی ﷺ میں علمائے کرام سیرت النبی ﷺ کے مختلف گوشوں پر روشنی ڈالتے ہیں جب کہ جلوس عید میلادالنبی میں نعرہائے تکبیر ورسالت،آقا کی آمد مرحبا،مرحبا یا مصطفیٰ جیسے نعروں ،صلوٰة وسلام اور ذکر واذکار سے گلی محلے اور راستے گونج اٹھتے ہیں چنانچہ علاقۂ تھار کے اکثر گاؤں وقصبات جیسے سیڑوا،ہرپالیہ، سینہار، تالسر، کونرا،ایٹادا،میٹھے کاتلا،ابرے کاپار، دیراسر،میکرن والا،دیتانی، کھڈانی، راناسر، گفن ناڈی،کھاریا راٹھوران، لکھڑیالی،بکڑ، لدہے کاپار، بینڈے کاپار، ہینڈیا،آساڑی سندھیان، آگاسڑی، انروڑ،آچارانیوں کی ڈھانی، سولنکیا،وغیرہ کے مسلمانوں نے جلسہ وجلوس عیدمیلادالنبی کا اہتمام کیا-مگر مرکزی جلوس گاگریا و علاقۂ گپن سے سہلاؤشریف تک نکالا گیا ان دونوں جلوسوں میں ہزاروں فرزندان توحید نے شرکت کی-
ان دونوں مرکزی جلوسوں [جس میں علاقہ کھاوڑ کے مختلف جلوس راستے میں ضم ہوجاتے ہیں] کے علاقۂ تھار کی مرکزی دینی درسگاہ دارالعلوم انوارمصطفیٰ درگاہ حضرت پیرسید حاجی عالی شاہ بخاری پچھمائی نگر،سہلاؤشریف پہنچنے پر دارالعلوم ودرگاہ شریف کی انتظامیہ کمیٹی اور دارالعلوم کے اساتذہ وطلبہ وعلاقے کی عوام نے شاندار استقبال کیا-
جلوس کے سبھی شرکاء دارالعلوم پہنچنے کے بعد دارالعلوم انوارمصطفیٰ کے وادی رحمت وانوارمیں منعقدہ جلسۂ عید میلادالنبی ﷺ میں شریک ہوگیے اور جلسۂ عیدمیلادالنبی کی شروعات تلاوت کلام ربانی سے کی گئی بعدہ بارگاہ رسالت مآب ﷺ میں نعت رسول پیش کرنے کے لیے ثنا خوان رسول حضرت مولانا رحمت اللہ انواری کودعوت دی گئی،آپ نے بہترین نعت رسول پڑھ کر مجمع میں وجد کی سی کیفیت طاری کر دی، پھر افتتاحی تقریر حضرت مولانا قاری ریاض الدین سکندری انواری نے کی،بعدہ عالم باعمل مصلح قوم وملت حضرت علامہ حافظ وقاری اللہ بخش صاحب اشرفی خطیب وامام نگینہ مسجد باسنی نے محبوب خدا،وجہ وجود کائنات،خاتم الانبیاء، رحمة للعٰلمین حضور نبی رحمت ﷺ کی سیرت طیبہ بالخصوص حضور نبی اکرم ﷺ کی ولادت باسعادت کے حالات وواقعات نہایت عمدہ پیرایہ وانداز میں بیان کرتے ہوئے حضور نبی اکرم ﷺ کی تعلیمات وپیغام عدل وانصاف و بھائی چارگی پر عمل کرنےاور حضور کے صحابۂ کرام کے سوانح وحالات سے سبق لینے کی تاکید کی-
خصوصی اور انقلاب آفریں خطاب فخرصحافت حضرت علامہ مفتی محمدفیاض صاحب رضوی ایڈیٹر ماہنامہ ماہ طیبہ جودھپورنے جان کائنات رحمت اللعالمین ﷺ کے میلاد مبارکہ کے حوالہ سے کی-
آپ نے عطیم الشان جلسۂ عیدمیلادالنبی کے سامعین کو
خطاب کرتے ہوئے کہا کہ رحمت دوعالم محبوب خدا مسیحائے کائنات بن کر تشریف لائے اور سماج و معاشرہ سے بدامنی، بدعنوانی، ظلم وستم اور نفرت و عداوت ختم کیا، اور زندہ درگور ہورہی بیٹیوں کو نئی زندگی عطا فرمائی اس لئے ہمیں بھی چاہیے کہ ہم نبی آخرالزماں کی تعلیمات کو عام کرنے کی کوشش کریں اور سرکار کی تعلیمات و ارشادات اور پیغام کے مطابق اپنی زندگی گذارنے کی ہر ممکن کوشش کریں-
ساتھ ہی ساتھ آپ نے اتحاد بین الاقوام اور ملک سے محبت وفاداری پر خطاب کرتے ہوئے فرمایا کہ ہمارا مذہب ہمیں یہ تعلیم دیتا ہے کہ ہم اپنے ملک ووطن سے عقیدت و محبت رکھیں لہذا ہمارے ملک کو اگر خون دینے کی ضرورت پیش آئی تو ہم مسلمان اپنے ملک عزیز کے لیے بلاتردد اپنا خون پیش کرکے اپنے ملک کی حفاظت کریں گے-
آخر میں دارالعلوم انوارمصطفیٰ سہلاؤشریف کے مہتمم وشیخ الحدیث نورالعلماء پیرطریقت حضرت علامہ الحاج سیدنوراللہ شاہ بخاری نے جملہ ارکان واساتذہ دارالعلوم انوارمصطفیٰ وانتظامیہ کمیٹی درگاہ حضرت پیر سید حاجی عالی شاہ بخاری کی طرف سے جلسہ وجلوس عید میلادالنبی میں شامل سبھی حضرات بالخصوص غلامانِ بخاری کمیٹی گاگریا[علاقہ:کھاوڑ] وعلاقۂ گپن کا شکریہ ادا کیا جن کے بینر تلے یہ دونوں مرکزی جلوس پرامن طریقے پر اپنے متعینہ مقامات سے ہوتے ہوئے درگاہ گراؤنڈ میں بخیر وعافیت پہنچے-
خصوصی نعت خوانی کاشرف بلبل باغ مدینہ واصف شاہ ہدیٰ حضرت مولاناقاری محمدجاوید صاحب سکندری انواری نے حاصل کیا،جب کہ نظامت کے فرائض طلیق اللسان حضرت مولانامحمدحسین صاحب قادری انواری نے بحسن وخوبی سرانجام دی-
اس جلسہ وجلوس عیدمیلادالنبی ﷺ میں سیکڑوں علماء وسادات کرام کے ساتھ ہزارہا ہزار عوام اہلسنت نے شرکت کرکے آقا ﷺ سے اپنی غلامی کاثبوت پیش کیا-
صلوٰة وسلام اور نورالعلماء حضرت علامہ الحاج سیدنوراللہ شاہ بخاری کی دعا پر یہ جلسۂ عید میلادالنبی ﷺ اختتام پزیر ہوا۔
رپورٹ: محمد شمیم احمد نوری مصباحی
خادم: دارالعلوم انوارمصطفیٰ سہلاؤشریف،باڑمیر(راجستھان)
اپنے وہاٹس ایپ پر تازہ ترین خبریں پانے کے لیے یہاں کلک کریںْ!
