مالیگاؤں: نوری مشن نے سالِ گزشتہ عرسِ تاج الشریعہ پر تاج الشریعہ امدادی کلینک کا آغاز کیا۔ افتتاحی دُعا حضرت سید عبدالقادر جیلانی میاں صاحب ممبئی نے کی- اوپی ڈی کا آغاز یکم جولائی ۲۰۲۱ء کو ہوا۔ بحمدہٖ تعالیٰ کلینک کی خدمات کا ایک سال مکمل ہوا۔ اس درمیان تقریباً دس ہزار مریض مستفیض و شفا یاب ہوئے۔ جہاں ڈاکٹر زاہد احمد صاحب مخلصانہ خدمات انجام دے رہے ہیں۔ الحمدللہ! کلینک پابندی سے روزانہ شام میں جاری ہے۔ اسی طرح کلینک کی دوسری برانچ نور نگر میں جاری و ساری ہے۔ بہر کیف تاج الشریعہ کلینک کو عبدالرشید پٹھان صاحب کی نگرانی نیز احبابِ مشن معین پٹھان رضوی، فرید رضوی، غلام مصطفیٰ رضوی، شہزاد برکاتی، یاسین رضا کی توجہ حاصل ہے۔ اس ضمن میں منتظمین نے اس بات کا اظہار کیا کہ نوری مشن سے ایک مدت سے فلاحی و طبی خدمات کا سلسلہ جاری ہے۔ تاج الشریعہ کلینک کی کامیابی در اصل حضور تاج الشریعہ علیہ الرحمۃ کا روحانی فیض ہے۔ خدمتِ خلق بڑی نعمت ہے اور اس باب میں کوشش کامیابی کی منزل تک لے جاتی ہے۔ ان شاء اللہ نوری مشن اور اعلیٰ حضرت ریسرچ سینٹر کے توسط سے اس رخ سے جدوجہد جاری رہے گی۔ ایسی رپورٹ نوری مشن نے ارسال کی۔
اپنے وہاٹس ایپ پر تازہ ترین خبریں پانے کے لیے یہاں کلک کریںْ!
