اتوار کے روز لاپتہ ہونے والے طیارے کی پہاڑ پر گر کر تباہ ہونے کی تصدیق گزشتہ روز ہوئی۔
کھٹمنڈو(انٹرنیشنل ڈسک)گلوبل ٹائمز میڈیا یورپ کے مطابق نیپال میں طیارہ حادثے کے نتیجے میں ہلاک ہونے والے تمام 22 مسافروں کی لاشیں مل گئیں ہیں.میڈیا رپورٹس کے مطابق اتوار کے روز لاپتا ہونے والے طیارے کی پہاڑ پر گرکر تباہ ہونے کی تصدیق گزشتہ روز ہوئی، نجی کمپنی کا طیارہ نیپال کے ضلع موستانگ کے پہاڑپر گر کر تباہ ہو ہے.ریسکیو حکام کا بتانا ہے کہ جائے حادثہ پر امدادی کارروائیوں کے بعد طیارے میں سوار تمام 22 مسافروں کی لاشیں مل گئی ہیں جب کہ ٹیموں نے طیارے کا بلیک باکس بھی حاصل کرلیا جسے بیس اسٹیشن منتقل کیا گیا ہے۔ریسکیو حکام نے بتایا کہ جائے حادثے سے ملنے والی تمام لاشوں کو ایم آئی 17 ہیلی کاپٹر کے ذریعے بیس اسٹیشن منتقل کردیا گیا ہے، جائے حادثہ پر 50سے 60 ریسکیو اہلکار تعینات ہیں تاہم خراب موسم کے باعث امدادی کارروائیوں میں شدید مشکلات کا بھی سامنا ہے۔
ریسکیو حکام کے مطابق ریسکیو آپریشن اور لاشوں کی منتقلی کے لیے ہیلی کاپٹر کی مدد لی جارہی ہے جس کے تحت اہلکاروں اور لاشوں کو ہیلی کاپٹر کے ذریعے بیس اسٹیشن منتقل کیا جارہا ہے۔میڈیا رپورٹس کے مطابق سول ایوی ایشن اتھارٹی نیپال کا کہنا ہیکہ ابتدائی تحقیقات سے یہ بات ظاہر ہوتی ہیکہ طیارے کو حادثہ خراب موسم کی وجہ سے پیش آیا ہے۔ڈی جی سول ایوی ایشن کا کہنا تھا کہ ابتدائی تحقیقات سے پتا چلا ہیکہ خراب موسم میں پرواز کرنے والے طیارے کو بائیں کی بجائے دائیں طرف کا رخ کرنا چاہیے تھا لیکن پائلٹ نے غلط رخ اختیار کیا جس سے حادثہ پیش آیا ہے.
